മൂത്തു നരച്ചവന്റെ മുതുകെല്ലില്
പൂത്തുലഞ്ഞ നെല്പ്പാടങ്ങളുടെ
ഫോസിലുകള്
പാതി മരിച്ചവന്റെ നെഞ്ചിനുള്ളില്
സ്വാതന്ത്ര്യത്തിന്റെ
തുരുമ്പിച്ച വെടിയുണ്ടകള്
ആരുറിമയാതാവന്റെ
ആത്മാവില്
മാമാങ്കങ്ങളുടെ മണിക്കിണരുകള്
മൂടാതെ കിടക്കുന്നു
പാതിരാവില് പതുങ്ങിയെത്തിയ
പല്ലക്കുകളുടെ കാമാഘോഷം
മറുകര കയറും മുന്പ്
പ്രളയമെത്തി .
കലങ്ങി മറിഞ്ഞ കടല്ത്തിരകള്
ചരിത്രത്തിന്റെ തുരുത്തുകളില്
നാവ് കൊണ്ട് പറയാത്തതാണ്
നാരായം കൊണ്ടെഴുതിവെച്ചത്
അതിനാല് നാവില്ലാത്തവന്റെ
നാഡിമിടിപ്പുകള്
ആഴങ്ങളില് മുങ്ങിത്തപ്പി
ആത്മവൃക്ഷത്തിന്റെ വിത്തെടുത്ത്
കൊടുംകാറ്റില് വിതയ്ക്കുന്നു