വസ്തുനിഷ്ഠതയാണ് ഗ്രന്ഥത്തിന്റെ സൗന്ദര്യം

'ഈ പുസ്തകത്തിലെ ഭാഷയെകുറിച്ചുകൂടി ലഘുവായൊന്ന് സൂചിപ്പിക്കേണ്ടത് ഇക്കാലസ്ഥിതിക്ക്ഒഴിച്ചുകൂടാനാവാത്തതാണെന്ന് തോന്നുന്നു. യാതൊരുനാട്യവുമില്ലാതെ നേര്‍ക്കുനേരെ കാര്യം പറയുന്ന രീതിയാണ് ഈ ഗ്രന്ഥത്തിലുടനീളം. ആഖ്യാനത്തെ 'സാഹിത്യ'മാക്കാനുള്ള കമ്പം എവിടെയുമില്ല. വികാരസ്പര്‍ശം വേണ്ടെടത്ത് അതുണ്ട് താനും. പറയാനുള്ളത് മുഴുവന്‍ വെളിപ്പെടുത്താനുള്ള പദാവലികളും പ്രയോഗഭംഗികളും ഗ്രന്ഥകാരന് കൈമുതലായുണ്ട്. ഏകസ്വരതകൊണ്ട് ചെടിപ്പുളവാക്കുന്ന പത്രഭാഷയില്‍നിന്ന് വിട്ടുനില്ക്കാനുള്ളത്രാണിയുംഅദ്ദേഹത്തിനു വശമാണ്. ചുരുക്കത്തില്‍ വായനക്കാരന്റെ മുഖത്തുരസുന്ന രചനാധാര്‍ഷ്ഠ്യം ഒട്ടുമില്ലാതെ, മലയാളഭാഷയും അതിന്റെ ആഖ്യാനവും സിദ്ധികൂടിക്കഴിഞ്ഞിട്ടില്ലെന്ന ആശ്വാസം പകരുന്നതാണ് ഈ കൃതിയിലെ ഭാഷ'. 

ഇതഒരുജീവചരിത്രഗ്രന്ഥത്തിന് ലഭിക്കാവുന്ന നല്ലൊരു സാക്ഷ്യപത്രമാണ്. പലകൃതികളും വായനായോഗ്യമല്ലാതായിപ്പോവുന്നത്, അത് സാഹിത്യമാക്കാനുള്ളവൃഥായത്‌നം മൂലമാണ്. സാഹിത്യത്തെയും ജീവിതത്തെയും പറ്റി അറിവില്ലാത്തവര്‍ക്ക് പറ്റിപ്പോവുന്ന അബദ്ധമാണത്. എന്നാല്‍ കെ. വി. കുഞ്ഞിരാമന് സാഹിത്യമെന്തെന്നറിയാം, ഭാഷയെന്തെന്നറിയ.ാം, ജീവിതമെന്തെന്നറിയാം. പത്രഭാഷയെന്തെന്നറിയാവുന്നതുകൊണ്ട്,  എന്തല്ല പത്രഭാഷയെന്നുമറിയാം. ഈയറിവ് കേളപ്പജിയുടെ ജീവചരിത്രത്തെ ഒട്ടൊന്നുമല്ല അനുഗ്രഹിച്ചിരിക്കുന്നത്. 

കെ. കേളപ്പന്‍ കേരളത്തി്‌ന്റെ അപൂര്‍വ്വമായ  ഒരുലബ്ധിയാണെന്നറിയാത്തവരാരുമില്ല. കേരളഗാന്ധിയെന്ന വിളിപ്പേരില്‍ അദ്ദേഹം കേരളത്തിനും ഇന്ത്യയ്ക്കും അഭിമാനമായ്ത്തീര്‍ന്നു.  ഗാന്ധിജി ഇന്ത്യന്‍ പതിതന്റെ വിമോചകനും രക്ഷിതാവുമായിത്തീര്‍ന്നപോലെ കേളപ്പന്‍ പാക്കനാര്‍പുരം കേന്ദ്രമായി പതിതജനവിഭാഗങ്ങളുടെ വിമോചകനും രക്ഷിതാവുമായി വര്‍ത്തിച്ചു. പാരതന്ത്ര്യം വിധികല്പിതമാണെന്ന വിഷാദഭൂമിയിലല്ല അദ്ദേഹത്തിലെ വിമോചകന്‍ പ്രവര്‍ത്തിച്ചത്. മനുഷ്യകൃതമായ ജാതിപാരതന്ത്ര്യം സഹസ്രാബ്ദങ്ങളായി ഇന്ത്യയെ വരിഞ്ഞുമുറുക്കുകയായിരുന്നു. ഇന്ത്യന്‍ സംസ്‌കൃതിയുടെ മഹാപ്രവാഹം അതിന്റെ മനോജ്ഞമായ ലബ്ധികളോടെ പരിഷ്‌കൃതലോകത്തോട് എക്കാലത്തും കിടപിടിച്ചുനില്‌ക്കെ തന്നെ അത്രയും കാലം ജാതിയുടെ പേരിലുള്ള അസമത്വവും പീഡനവും ഇന്ത്യന്‍ സംസ്‌കൃതിയുടെ മഹാരോഗമായിനിലനിന്നു. അതിനെതിരെ ചരിത്രത്തിലുടനീളം നടന്ന മഹാസമരങ്ങളുടെ പരമോന്നതിയായിരുന്നു ഗാന്ധിയന്‍ വിപ്ലവം. ആ വിപ്ലവത്തിന്റെ കേരളനായകനായിരുന്നു, കേളപ്പന്‍. നവോത്ഥാനമൂല്യങ്ങളുടെ പ്രയോഗവത്കരണമാണ് ഈ കര്‍മ്മത്തിലൂടെ കേളപ്പന്‍ നിര്‍വ്വഹിച്ചത്. അതിന് രാഷ്ട്രീയമില്ലാതെ സാധ്യമല്ലെന്ന് ഗാന്ധിജിയെ പോലെ കേളപ്പനും മനസ്സിലാക്കി. അരാഷ്ട്രീയ ലോകസോഷ്യല്‍ ഫോറം ലോകമുതലാളിത്തകുതന്ത്രങ്ങള്‍ക്ക് മുമ്പില്‍ പരാജയപ്പെടുന്നതുപോലെ അരാഷ്ട്രീജാതിവിമോചനപ്രസ്ഥാനവും പരാജയപ്പെട്ടുപോവുമായിരുന്നു. ഇന്നും അരാഷ്ട്രീയമായി സംഘടിപ്പിക്കപ്പെട്ട ജാതിപ്രസ്ഥാനങ്ങള്‍ രാജനീതിയേയും രാജ്യനീതിയേയും വെല്ലുവിളിക്കുകയും അവയോട് ആജ്ഞാപനങ്ങള്‍ നടത്തുകയുമാണ് ചെയ്യുന്നത്. ഇതറിയുന്ന രാഷ്ട്രീയനായകനായിരുന്നു ഗാന്ധിജി. ഒരുപക്ഷേ ഇന്ത്യയറിഞ്ഞ ഏറ്റവും തന്ത്രശാലിയായ രാഷ്ട്രീയനായകന്‍. രാഷ്ട്രീയം മഹാപാപമെന്ന് കരുതുന്ന ഇക്കാലത്ത് ഗാന്ധിജിയെ മനസ്സിലാക്കുന്നവര്‍ അദ്ദേഹത്തിന്റെ മുദ്രാവാക്യങ്ങളുടെ പ്രസക്തി അറിയണം. അന്ത്യോദയത്തിന്റെ മഹാതത്ത്വമാണ് ഗാന്ധി പ്രചരിപ്പിച്ചത്. ആ മുദ്രാവാക്യമാണ് കേളപ്പന്‍ പ്രാവര്‍ത്തികമാക്കാന്‍ ശ്രമിച്ചത്. 

 

ഈ രചയിതാവിന്റെ മുന്‍ലക്കങ്ങളീലുള്ള രചനകള്‍ കാണുക